ويلكَم باك

بقالي زمان ها.. من يوم ما السيد الرئيس يا بغل بقى البغل.. قصدي الرئيس...

بس عامة أنا مش هنا عشان أتكلم عليه ولا على جماعته المش عارف إيه اللي السادة قرآئي هنا عارفين رأيي فيها من زمان.. 

لأ لأ...

أنا هنا عشان حوار تاني خالص.. أنا هنا عشان أحاول أحُط قطرة في العين.. يعني شوية كلام مش بيودّي ولا بيجيب..

يعني هفكّر شوية و أهدملكم شوية خرافات.. طبعاً مش ههدمهم علطول.. لازم آخد تصريح من مخ سعادتك يمكن تتقبل قراية كلامي للآخر...

مش عارف ممكن أبدأ الحوار ده من أمتى... بس قشطة هحاول أوافيكم بالأخبار...

الطفولة الثورية

ها خلاص؟ خرجنا غضبنا في التحرير و المسيرات؟ نتكلم بالعقل بقى شوية وللا إيه؟

كلنا متفقين إن الثورة اتقتلت باستفتاء 19 مارس؟ أيوه اتقتلت... ياما عدنا و زيدنا.. ياخوانا المرحلة الثورية ما ينفعش فيها سياسة.. قالوا نحاكم مبارك مدنياً.. ياخوانا محاكم ثورية عشان القصاص للشهداء... قالوا لأ عشان فلوسنا ترجع... خلاص الراجل أخد 25 سنة و معجبناش الحكم.. ولا الفلوس رجعت... الناس نزلت التحرير و القضاء الخاين العميل و مش عارف إيه... الراجل ما كذبش.. ما فيش أدلة... اسألوا حتى زكريا عزمي اللي استقال من ديوان عام رئاسة الجمهورية بعد التنحي بكام شهر.. اسألوا مقرات أمن الدولة... بيقولوا ما يبقى الحكم سياسي بحت مش قانوني.. يعني محاكم ثورية يعني؟ مش رفضتوها في الأول؟؟ خلاص ملكمش عين تتكلموا.. أنتوا اللي وافقتوا إن النظام يحاكم نفسه بقوانينه... ملكمش حق الكلام...

طب تطبيق قانون العزل؟ مش وافقتوا تشاركوا في الانتخابات من الأول؟ الشارع ببساطة شايف ناس خسرت في الانتخابات و جاية في أي مصلحة... لو حد فيكو كان فاز كنتوا هتعملوا كده؟؟ أشك... طب ليه بعد ما خسرتوا جايين تطالبوا بتطبيق قانون العزل؟ للدرجة دي بريق الكراسي عمى ضمايركم!! 

خلاص مجلس رئاسي... أهو أي حاجة بس شفيق ما يفوزش... قشطة معنديش مانع... بس برضه كنتو هتطالبوا بكده لو حد فيكو كان فاز؟ و ليه بتعيبوا على مرسي رفضه للمجلس الرئاسي؟ ليه عايزين تعملوه بالعافية؟ 

بس برضه لازم نتكلم بالعقل... المجلس الرئاسي في مصلحة الاخوان.. الاخوان دلوقتي شعبيتهم أقل.. مش في الأرض يعني بس أقل من أيام انتخابات البرلمان... من مصلحتهم إنهم يعملوا المجلس الرئاسي عشان ما يشيلوش الليلة لوحدهم.. البلد بايظة و الاقتصاد واقع و الاخوان مش هايرضوا يشيلوا الليلة لوحدهم... خلاص ليه مش موافقين على المجلس الرئاسي طيب؟ عشان مرسي في الصدارة.. و الراجل حقه يكون في الصدارة... ليه يقبل بكرسي ضمن مجلس رئاسي إذا كان الخاسرون رافضين لخسارتهم و عايزين كرسي!!

طب إيه؟ ما ينفعش ننحي المصالح جانباً و نسترجل شوية؟؟ الشعب مش هايرضى بالمجلس الرئاسي بديلاً للانتخابات... حقه.. الناس كانت مستنية الانتخابات من زمان... ليه بقى ما يصلحوش غلطتهم في أول الانتخابات و يعملوا فريق رئاسي؟ مرسي رئيساً و حمدين و أبو الفتوح نائبين أو واحد نائب و واحد رئيس وزراء أو واحد رئيس وزراء و واحد وزير خارجية... اي حاجة... اللي يعرفوا يتفقوا عليه... و يبقى الدعم ثلاثي من الحملات الانتخابية للتلاتة... و ساعتها فرص التزوير هتقل... و الإخوان مش هاينفردوا بالسلطة و الدنيا هتمشي... و لو حصل التزوير يبقى هم اللي جنوا على نفسهم...

معلش... قلنا كتير زمان عايزين مجلس رئاسي عايزين دستور الأول عايزين محاكمات ثورية محدش سمع الكلام... معلش... هنصلح غلطتنا و كل حاجة بس مش بالاسلوب ده و مش في التوقيت ده و مش في ظل الظروف دي اللي إحنا قبلناها على نفسنا و قبلنا شروطها و وافقنا على اللعب فيها.. نمشي فيها للآخر عشان بس اللي بيحصل ده ماسموش غير حاجة واحدة بس: طفولة ثورية!!

ملحوظة: أنا مقاطع من الأول و هقاطع تاني...

المجد للأحرار...

أيوه أنا سلبي عادي يعني....

أيوه... الانتخابات فاضلها كام يوم... الشعب مستنيها... أصلها هتخلصنا من حكم العسكر و هتفرض إرادة الشعب... زيها زي انتخابات مجلس الشعب بالضبط.... و هننتخب و هنتنفس حرية و هنلغوص صوابعنا في دم الشهداء... إحم... قصدي الحبر الفسفوري... قشطة العيشة هتبقى حلاوة عادي يعني...

طبعاً عيشتنا هتبقى حلاوة... مش المجلس العسكري اللي كان بيتكلم عن استفتاء على بقائه في الحكم هو اللي هينظم الانتخابات... عادي قشطة... ماهو هو برضه اللي عامل الاعلان الدستوري اللي متعدل فيه مواد الشعب استفتى عليها... و الشعب عايش.. عادي...

و هو برضه اللي هايعمل اعلان دستوري تاني أو هايعدل القديم عشان صلاحيات الرئيس... الرئيس اللي الشعب هاينتخبه... عادي يعني... إيه المشكلة لما تبقى صلاحيات الرئيس اللي محددها هو المجلس العسكري!! ما هو برضه اللي محدد صلاحيات مجلس الشعب... 

لأ لأ صحيح... أصل المرشحين للرئاسة مليانين كاريزما... هايقودوا الشعب لبر الأمان و الديموقراطية و النهضة... و هايردوا كيد المجلس العسكري في نحره... أصل المرشحين جامدين فشخ... و احنا شعب قوي فشخ... عرف يفرض إرادته على المجلس العسكري و يجبره على تسليم السلطة.. و طبعا المجلس العسكري خاف و هدد بحل البرلمان المنتخب.... عادي يعني....

هذا و عشان أنا ناكر للجميل و غير مقدر لقوة و عظمة الشعب, قررت أكون سلبي و أقاطع الانتخابات... لأ مش عشان المرشحين كلهم زي الخرا و مش عارف اختار مين... عادي يعني.... لأ مش عشان المجلس العسكري عايز الحرق و الشعب مسلمه ضهره.. عادي يعني... لأ برضه مش عشان لجنة الانتخابات مليانة فلول... برضه عادي يعني.. و لأ مش عشان المادة 28 اللي مابتسمحش بالطعن في نتيجة الانتخابات... لأ لأ كل ده عادي يعني مفيش جديد...

أومال إيه الجديد؟ الجديد يا سيدي إن الشعب الطيب بسلامته معندوش إرادة... معندوش وعي.... و لأ أنا مش بزايد... دي حقيقة.. و دي المعركة الحقيقية.. مش معركة الانتخابات... الثورة راديكالية تأمر لا تطلب... إحنا بنتذل بالانتخابات دي في الوقت ده.. فلتسقط و ليسقط من تأتي به... معركتنا الشعب يفهم... الشعب يعرف إن دي مش معركته دلوقتي... يعرف إنه مجبر على كده... مش هو اللي اختار... يعرف إن قوته في إيديه... براديكاليته الثورية مش في الانتخابات في غير وقتها.....

عشان كده و من منبري ده... أعلن تأييدي لعمرو موسى أو أحمد شفيق للرئاسة... أيوه عايز واحد فلول... عشان الشعب يشوف نفسه... يا إما يفوق لنفسه و ياخد ثورته من أولها يا إما يموت... زي ما أي شعب بيموت... عادي يعني...

و طبعاً عشان أنا بقول يسقط الرئيس القادم من زمان... مهما كنا قليلين و مهما كانوا الناس ضددنا.... هنفضل ثابتين على راديكاليتنا.. مؤمنين بثورتنا.... مش هتفرق معانا إن هايتقال علينا بعد الانتخابات خارجين على الشرعية... شرعية وهمية هايكون لينا شرف عدم المشاركة في صنعها.....

طوبى للأحرار... عادي يعني....

مؤامرة عسكرية أمريـ-بردعاوية

بقالي كتير ماكتبتش … بس كنت حاسس إن أول حاجة هكتبها بعد الغياب ده هاتبقى عن الرئاسة و بتاع... اللي لسه ماحددتش موقفي منها عامة... إنتظاراً لمفاجآت اللحظات الأخيرة...

في اثناء قرائتكم لهذه السطور, في شوية بني آدمين قلوا أو كثروا يعني في ميدان التحرير بيهتفوا للشيخ حازم و بيهددوا المجلس العسكري و أوباما -خد بالك بقى- في حالة إقصاء مرشحهم من سباق الرئاسة...

تعددت الأقاويل صراحة, في يقولك مؤامرة أمريكية ضد الحكم الاسلامي و تطبيق الشريعة و في يقولك المجلس العسكري بيمهد لتزوير الانتخابات و كلام كتير و بتاع... تعالوا كده نفصص الموضوع نقطة نقطة...

بالنسبة للمؤامرة الأمريكية, أنا حابب أطمنكم, أمريكا عايزة حازم... أمريكا – محور الشر المطلق و هادمة اللذات مفرقة الجماعات - ببساطة هتبقى معجبة و مشجعة جداً لأي نظام إسلامي – إن صح التعبير- عشان يبقى أي تدخل ليها في الشئون الداخلية و الخارجية مبرر.. إيران مثال واضح على اللي أنا بقوله.. ده طبعاً بإفتراض إن حازم هايبقى معادي لأمريكا, و أنا مش بشكك فيه و الله, بس أنا بعرض جانبي الموضوع.. مثال على الجانب الآخر ده هي السعودية.. واحدة من أكبر حلفاء أمريكا و من كبريات القواعد العسكرية ليها في العالم موجودة هناك..

نيجي بقى للمجلس العسكري العميل الخاين اللي مش عايز حازم يترشح... بيقولك بقى إن المجلس عايز يخرج حازم من السباق عشان يخلى الجو لمرشحيه, أو لنقل مرشحي الفلول عامة.. طب إديني عقلك كده, بالذمة ده كلام!! ببساطة العسكري من مصلحته وجود حازم في الانتخابات.. في حالة وجوده فده تفتيت بشكل أو بآخر لمرشحي التيار الاسلامي. كمان بافتراض نية العسكري تزوير الاتخابات هيكون أسهل عليه يزورها لصالح أحد مرشحي الفلول في وجود كذا واحد قدامه.. و هتكون الحجة برضه إن الأصوات متفتتة.. لكن لنفترض رغبة العسكري في إقصاء حازم, هايبقى الوضع صعب شوية.. المفروض مثلا إن اللي كانوا هايدوا لحازم هايدوا لأبو الفتوح و بكده هايبقى صعب يزور النتيجة لصالح منافسيه.. العسكري مش بالغباء ده عامة...

نيجي بقى لموضوع القانون نفسه... صراحة أنا مش مع قانون منع اللي حد من والديه مش مصري أو بجنسية مزدوجة من الترشح للرئاسة و شايف إن القانون ده عنصري لأن طالما إن المرشح نفسه معاه الجنسية فده يديه كافة حقوق حاملي الجنسية دون استثناء.. و ده كان أحد أسباب إن أنا قلت لأ في التعديلات الدستورية, و عشان نفس السبب اتهموا البرادعي بالعمالة عشان قالوا هايستغل المادة دي و يرشح نفسه و ينفذ مخططه الشيطاني الأجنبي بالرغم من إن الراجل و والديه و مراته مش معاهم الجنسية المصرية.. فقط لا غير...

بس على الجانب الآخر, نفس الأشخاص اللي قالوا إن الصناديق قالت للدين نعم في غزوة الصناديق, هم نفس الأشخاص اللي معترضين على المادة دي.. و وصل الأمر بأحد أنصار حازم إنه قال هنغير القانون عشان الشيخ يترشح!! بأي منطق تواجه العقليات دي نفسها!! و يرجعوا يقولوا اللي في الميدان خارجين على الشرعية و بيسقطوا هيبة الدولة!! بالشفا ياخوانا...

كلمة بقى للشيخ حازم صلاح أبو اسماعيل.... في جملة مشهورة – مش فاكر صراحة مين اللي قالها – بتقول : من قال لا أعلم فقد أفتى... الجملة دي أفتكرتها لما عرفت إن شيخنا المبجل قال إنه ماكانش يعرف إن والدته معاها الجنسية.. الكلام ده قاله بعد ما أكد إن هي مش معايا الجنسية.. و و صل الأمر بتكفير و اتهام اللي قال على الموضوع ده بأنه شيعي.. قشطة بغد النظر عن التهم دي يعني, أسلوب تعامل الشيخ – و بكرر الشيخ – حازم أسلوب لا يمت للمشيخة بصلة.. اللي أعرفه إن الكذب من آيات المنافق, و الشيخ كذب و قال إن والدته مش معاعا الجنسية الأمريكية.. هايقولك ماكانش يعرف هاقوله اقرا أول جملة في القطعة دي.. التثبت و التحقق من المعلومات جزء أصيل من أخلاق أولي العلم, و من الواضح – حتى من قبل الحوار ده – إن الشيخ حازم يفتقد النقطة دي كشيخ قبل ما يكون سياسي أصلاً.. حواراته مليئة بمثل هذه الأخطاء.. حوار بيبسي ده مثال واضح...

مش هتكلم أكتر من كده عن الموضوع ده عشان أخد أكبر من حجمه... عامة في دستور دلوقتي بيتسلق و احنا عارفين... و في انتخابات رئاسة مشبوهة من وجهة نظري بيترتب لها... أصحى لا الصاحي يغفلك... فوقوا يرحمكم الله...

ياكش تولع

الناس موافقة تعيش مع العسكر في الوهم .. وهم الإستقرار وانهم هيعيشوا كويس وهيعرفوا يأكلوا عيالهم .. كل ده مابيحصلش وبرضه موافقين على وجودهم ! وييجوا يعترضوا على العصيان وهو أصلا مش بيختلف كتير عن الوضع المزري اللي احنا عايشين فيه !!
طب يا سيدي حتى لو هيوقف البلد اسأل نفسك .. إنت فعلا بتاخد حقك من غير عصيان ؟ لو بتاخده يبقى ليك حق يا سيدي ! لو مش بتاخد حقك طب اصبر وشوف العصيان هيعملك إيه وساعتها اتكلم وقول .. مش العصيان ده برضه هو اللي مشى المخلوع ولا إيه !لكن لأ .. الناس موافقة يتضحك عليها بالوهم .. عشان هم خايفين ... طب خليكوا عايشين زي الارانب في الحفر وشوفوا هتقابلوا ربكم إزاي !! مش مستعدين يقايضوا الذل والهوان اللي هم عايشين فيه بـلحظة حقيقية من الكرامة هتعيشهم ملوك بعد كده أو حتى لو ماتوا بعدها .. هايموتو على رجليهم ....لكن لأ ... الموت وإنت واقف على رجلك ده قدر الرجال ... قدر اللي ربنا اصطفاهم عشان يبقوا جنبه ... يا رب أكون منهم ... يا رب !!

عصيان مدني .. سؤال و جواب

دي مجموعة من أشهر اتهامات أو لنقل أسباب رفض الناس لفكرة العصيان المدني. تعالوا كده بجد نشغل مخنا و نشوف فعلاً الكلام ده ينفع وللا لأ و عشان بس الأخوة الفتايين اللي رافضين العصيان لأسباب هتشوفوا الإجابة عليها هنا...

• الإتهام الأول: يقول البعض أن الإضراب و الإمتناع عن سداد الفواتير سيؤدي إلي عدم دفع الرواتب حيث أنه لا يوجد دخل للمؤسسة أو الشركة.
• الرد : أعتي و أطول العصيانات المدنية كان في بولندا عام 1989 ضد الحكم العسكري و إستمر فقط 11 يوم و هو العصيان الأطول في التاريخ ضد أكثر الأنظمة ديكتاتورية….و هذا يوضح أنه لا حكومة في العالم تستطيع تحمل العصيان المدني أكثر من أسبوع و أكثر بقليل …و لن يستمر بأي حال من الأحوال إلي شهر أو يؤدي إلي عدم دفع للرواتب…كما إن الثورة المصرية إستمرت 18 يوم كان أكثر نصف الك المدة في حالة كساد تجاري كبير و مع ذلك لم يؤدي الأمر إلي الإمتناع عن دفع الرواتب.
  
  

• الإتهام الثاني : لو إنت شغال في قطاع خاص مش حتلاقي مواصلات تروح بيها الشغل.
• الرد :حدث في مصر في الأونة الأخيرة بعد الثورة العديد من الإضرابات العمالية و الإعتصامات أشهرها إضراب عمال النقل العام عن الأتوبيسات الذي إمتد في جميع أنحاء الجمهورية و تبعه توقف تام في حركة أتوبيسات النقل العام التي تعد من أهم وسائل النقل في مصر…لذلك فهي لن تكون أول مرة تتوقف فيها المواصلات و لكنها هذه المرة للصالح العام.. كما إنه لو مفيش مواصلات تروح بيها شغلك في القطاع الخاص فهذا لا ينطبق علي شخص واحد فقط بل علي جميع العاملين معاك في الشركة و لن يستطيع أبدا المدير خصم أو فصل جميع العاملين بالشركة بالإضافة أنه حيكون مش بإيدهم.
  
  

• الإتهام الثالث :لو إنت شغال باليومية مش حتعرف تروح شغلك.
• الرد :و دي الحجة الأشهر... قلناها مئات المرات العصيان المدني هو الإمتناع عن العمل أو أي وسيلة إتصال مع الشركات الحكومية و ليست الخاصة أو الأعمال الخاصة و الحرفية…لذلك أصحاب اليوميات سيكونوا أقل فئة تأثراً بهذا العصيان….في الواقع سيكونون هم الفئة الوحيدة في هذا الوقت التي تجني مالاً.
  
  

• الإتهام الرابع : لو مريض مش حتلاقي مستشفي أو دكتور و لو عاوز دواء مش حتلاقي صيدلية و لو في حريقة مش حتلاقي مطافي.
• الرد: للمرة المليون نقولها العصيان المدني لا يشمل الوظائف الحرجة الضرورية مثل الأطباء و المستشفيات و الصيدليات و الإسعاف و المطافي.
  
  

• الإتهام الخامس : لو مش معاك فلوس مش حتعرف تسحب فلوس من البنك علشات قافل.
• الرد: غالبا صاحب الحجة دي مش عايش أصلا في مصر ولا عارف حالنا عامل إزاي…الواقع بيقول إن نسبة المصريين اللي معاهم فلوس في البنك و بيسحبوا منها أقل من 5% ….ده أصلا أكثر من 60% من المصريين عمرهم ما دخلوا بنك…إتهام ساذج للطبقة العليا المرفهة في مصر و التي لا تريد أن تشقي يومين لصالح البلد.
  
  

• الإتهام السادس :لو مدفعناش الفواتير حيقطعوا علينا المية و الكهرباء و الغاز.

• الرد : ليس من حق السلطات والمؤسسات أن تقطع تلك الخدمات عن المواطنين بشكل جماعي سواء كأحياء أو مدن أو غير ذلك فهو غير قانوني تماكا مثل عدم قانونية قطع الإتصلات أيام الثورة ….و حتي لو فعلوها فلنجرب حياة الكثير من المصريين حيث أنه من المعلوم أن الكثير و الكثير من القري المصرية مش واصلها مياه نضيفة أو كهرباء علشان تتقطع أصلا.
  
  

و الله المُوفَّق و المُستعان.

برضه هنخرب البلد ؟

تحية للراجل الطاهر ده ... الحق بَيّن و الباطل بَيّن .... مفيش بعد الكلام كلام ... يسقط يسقط حكم العسكر .... و الله المستعان.