احساس حلو ان انت
تشارك ﻷول مرة في حياتك – سواء كنت راجل
كبير أو ست بيت مش فاضية أو حتى شاب صغير
عمره ما شاف انتخابات – في أول انتخابات
حرة و نزيهة – المفروض يعني – تحصل في
مصر, يمكن من أول
ما التاريخ بدأ يتكتب.
اسمحلي افسد عليك
فرحتك, ايوه هفسد
عليك فرحتك بالانتخابات دي,
قبل ما المجلس يفسدها عليك بعد النتيجة,
بالضبط زي ما عمل في الاستفتاء.
انا هنا ما بمثلش غير نفسي,
عشان بس محدش يقولي شوف ادي شوية
العيال اللي نزلوا التحرير مش عايزين
انتخابات.
ايوه انا مش هروح
انتخب, هروح ابطل
صوتي, يمكن عشان
في دايرتي بالذات صوتي مش هايفرق كتير
عشان النتيجة شبه محسومة,
بس ﻷ ده ماكانش الدافع بتاعي,
انا مشكلتي في حاجة واحدة بس … المجلس!
حد يقولي ازاي
تأتمن منظومة وافقت على قتل و اصابة مئات
المتظاهرين العزل,
معظمهم في مقتبل العمر,
و ذلك لمدة اسبوع كامل دون التدخل
لحمايتهم! بل و
شاركوا أيضا في تلك المذبحة بالرصاص تارة,
و بالسكوت و عدم تقديم الجناة للمحاكمة
تارة أخرى!!
حد يقوللي ازاي
تأتمن ان صناديق اليوم الأول تبات في حضن
الحكومة ليلة!! هل
هيحميها اللي كان بيقتلنا في محمد محمود,
وللا الأخ اللي اسمه الزند – رئيس
نادي القضاة لمن لا يعرف -
اللي قال ان متظاهري التحرير بلطجية!!
و على رأي واحد,
الصناديق اللي تنام ليلة عند الحكومة
لا أثق في عذريتها!!
حد يقوللي ازاي
تأتمن انتخابات دعت ليها منظومة عايزة
تمشي من الحكم باستفتاء على وجودها!!
طب ما تعمل حضرتك استفتاء على مجلس
رئاسي أحسن و تسيب السلطة اللي انت هتموت
و تسيبها و حاسس انها هم تقيل عليك!!
أنا عارف ان في
ناس كتير هتقوللي يا عم روح انتخب و سيبها
على الله, انت
مش عايز البلد تستقر بقى!!
مش عايز المجلس يسلم الحكم,
خليه يسلم لمجلس الشعب!!
أحب أقوله روح راجع كلام شاهين اللي
معرفش يمسك لسانه و قال ان البرلمان هيكون
من غير صلاحيات,
مالوش أي سلطة على الحكومة,
و طبعا المجلس اللي – طبقا لشاهين
برضه – هيحتفظ بكل صلاحياته بعيدا عن
الدستور … و سمعني سلام العسكر علينا حق
!!
ده كله كوم و ان
اغلبية برلمانية هي اللي هتحط الدستور
ده كوم تاني … محدش يقوللي هايبقوا اغلبية
و هيتعمل عليه استفتاء,
عشان أكيد اللي انتخب الاغلبية هيوافق
على دستورهم, و طبعا مفيش أغلبية هتعمل دستور محايد,
ﻷنهم ببساطة لو ماهمش شياطين فهم
برضه مش ملايكة!!
و بعدين تعالى
أقولك بصراحة كده ,
مش في ناس – بعد موقف الاخوان المخزي
من التحرير – حولت للسلفيين و قالت
تنتخبهم؟ اكيد اكيد – و التاريخ بيقول
كده – هيضطروا يعملوا كتلة في البرلمان
عشان يضمنوا اغلبية,
و ساعتها الكتلة مش هتبقى معبرة عن
اغلبية بالنسبة للي انتخب السلفيين,
عشان هم مش راضيين عن الاخوان اصلا!!
و بكده هيبقى عندنا دستور متفصل ببساطة
و حظ سعيد الثورة القادمة!!
لا
يصح إلا الصحيح,
الناس عايزة تكروت كل حاجة بحجة ان
البلد واقفة و عشان نخلص من المجلس و و و
...لا مؤاخذة يعني
تونس مالها ؟؟ عملت كل حاجة و الدولة
اتسلمت لمدنيين في نص المدة اللي المجلس
بيدعي انه هيسلم السلطة فيها...
ده بافتراض انه سلمها اصلا بنهاية
شهر ستة, مع العلم
ان الانتخابات هتخلص في نص يناير,
بعدها هنعمل لجنة تأسيسية و دستور و
استفتاء و انتخابات برلمانية تاني طبقا
للدستور الجديد و بعدين رئاسة,
كل ده هيحصل في أقل من ست شهور؟؟ و لو
كان كده المجلس معملش الكلام ده من اﻷول
ليه ؟؟ وللا هو اي هبل و محدش فاهم!
تسليم السلطة
للمدنيين و الدستور اولا يا سادة يرحمكم
الله !!
ااه و ماتنسوش
تكتبوا يسقط يسقط حكم العسكر على الورقة,
على شوية شتايم كده :D
