أنا مش فاهم هي الناس عايزة ثورة تاني ليه! ثورة غضب و عملنا .. يسقط النظام و أسقطنا .. الرئيس مبارك و أهو مرمي في الجناح الرئاسي بتاع المركز الطبي العالمي! انتو عايزين إيه تاني! لا بجد! ما هو المجلس العسكري حلو و وعد إنه هيسلم السلطة و عمل انتخابات مجلس الشعب! يعني يعملكو تاني إيه أكتر من كده مش فاهم يعني ! بس فالحين بس تقولو يسقط يسقط حكم العسكر! مش كفاية الناس دول حامينكو من البلطجة اللي بيحرقو في البلد! و موفرنلكو انابيب البوتاجاز و البنزين! لأ وكمان هيوزع عليكو كوبونات جوايز في عيد الثورة! يمكن واحد يطلعلو عربية بي إم زي بتاعة أسماء محفوظ وللا حاجة! لأ و كمان بتقلو أدبكم علي الناس الكُبارة دي! أي نعم يعني هم بيقتلو في الشباب الصُغير و الشيوخ بتوع الأزهر بس ولو .. برضه لازم نحترم سنهم!
أصلا إيه اللي مِنزل الشيخ عفت مع البلطجية دول؟ بتقول إيه ؟ عشان الحرية و الكرامة ؟ حرية إيه يابو حرية ؟ عايز واحد زي البرادعي اللي بينادي بإسقاط النظام و دخل أمريكا العراق يمسكنا يعني! ليه هو فاكر نفسه مبارك مثلا! ده حتى مبارك ساعة لما ساعد أمريكا دخل حاملات الطائرات قناة السويس مش تقولي ملقيناش أسلحة دمار شامل! يا راجل بلا خيبة!
لأ و تعالى هنا قل لي .. شهدا مين اللي ماتو دول؟ عايز تقنعني إن في حرامي رفض أمر ضباط الداخلية إنه يهرب فضربوه بالنار يبقى كده شهيد ؟ عايز تقنعني إن خالد سعيد اللي فضح ممارسات الداخلية و تعذيبها للناس ده برضه شهيد ؟ وللا تكونش عايز تقولي إن مينا دانيال المسيحي شهيد! هي الشهادة دي بنرميها لأي حد كده! معدش غير البلطجية اللي عايزين حرية كمان...الله؟ الساعة تسعة ؟ هاتلنا يابني عمك توفيق عكاشة بلا وكسة!
No comments:
Post a Comment